ՍՈՒԻՑԻԴԸ ՈՐՊԵՍ ՍՈՑԻԱԼ-ՀՈԳԵԲԱՆԱԿԱՆ ՖԵՆՈՄԵՆ
Այս ընթացքում աշխարհում ինչ-որ մեկն ինքնասպան եղավ: Եվ այսպես ամեն րոպե: Օրվա ընթացքում աշխարհում ինքնասպան են լինում 2 300 մարդ, իսկ տարվա ընթացքում 800 000 մարդ: Տարբեր տվյալներով 8-30 միլիոն մարդ իրականացնում է անհաջող ինքնասպանություն: Ընդ որում ինքնասպանության փորձ իրականացրած անձանցից յուրաքանչյուր երկրորդը մեկ տարվա ըևնթացքում կրկնում է իր փորձը, սովորաբար ավելի բարդ ձևով: Ինքնասպանության փորձեր հիմնականում իրականացնում են հոգեպես առողջ մարդիկ: Սուիցիդը մահացու ելքի դեպքում խոր տրավմա է հասցնում իր մտերիմներին և հարազատներին: Չհաջողված սուիցիդները հաճախ հանգեցնում են հաշմանդամության:
Ավելի հաճախ ինքնասպանություն են գործում միայնակ, բաժանված և այրիացած տղամարդիկ, 4 անգամ ավելի շատ, քան կանայք (ըստ Ժորժ Կլեմանսոնի կանայք տղամարդկանցից ավելի երկար են ապրում, հատկապես այրիները):
Ինքնասպանության առավել բարձր մակարդակ դիտվում է բժշկների մոտ, հատկապես կանանց` հոգեբույժների, անզգայացնողների, ատամնաբույժների, նաև փաստաբանների մոտ: Այս անձանց մոտ սուիցիդի պատճառ կարող են լինել աշխատանքի ինքնատիպությունը, վերջինիս հետ զուգորդվող մի շարք առանձնահատկություններ, ինչպես նաև ցածր ինքնագնահատականը:
ՈՐՊԵՍ ԿԱՆՈՆ, ՃԳՆԱԺԱՄԱՅԻՆ ԽՆԴԻՐՆԵՐԸ ՄԻԱՅՆԱԿ ԼՈՒԾԵԼ ՉԻ ՀԱՋՈՂՎՈՒՄ
Ճգնաժամից դուրս գալը միկրոսոցիալական և հուզական օգնություն է պահանջում, ինչպես նաև սուիցիդոգեն դիրքորոշումների կոռեկցիա: Որոշ դեպքերում ճգնաժամային վիճակում գտնվող այցելուներին անհրաժեշտ են թրենինգներ կյանքի տվյալ իրավիճակում ադապտացիայի պակասող հմտությունների ձևավորման համար: Այսպիսով, ճգնաժամային խնդիրները տարբեր ոլորտներ են շոշափում` հոգեբանություն, մանկավարժություն, հոգեբուժություն: Այդ պատճառով սուիցիդենտներին օգնության ամենակարևոր մեթոդը պետք է լինի հոգեթերապիան` որպես այդ բնագավառների սահմանագծին գտնվող առարկա: Սակայն հոգեթերապիայի տրադիցիոն մեթոդները, որոնք նախատեսված են առանց սուիցիդալ ռիսկի հիվանդների բուժման համար, պիտանի չեն ճգնաժամային խնդիրների լուծման համար: Շատ ակտուալ է դառնում հոգեթերապիայի նոր, սպեցիֆիկ մեթոդների մշակման և ներմուծման խնդիրը, որոնք թույլ կտան արդյունավետ կերպով յուրացնել սուիցիդալ տենդենցները և կանխարգելել դրանց առաջացումն ապագայում: | 
