ՉԵՄ ՈՒԶՈՒՄ ԴՊՐՈՑ ԳՆԱԼ
6-11 տարեկանում ֆոբիաները սկսում են այլ` ավելի սոցիալական բնույթ կրել:
Եթե ձեր փոքրիկը մանկապարտեզ չի հաճախել, ապա նրա համար դժվար կլինի միանգամից ներգրավվել դպրոցական մեծ կոլեկտիվի մեջ, իսկ ավելի բարդ կլինի հարմարվել կարգ ու կանոնին: Նա կսկսի վախենալ, որ ժամանակին չի հասնի դպրոց, չի գոհացնի ուսուցչին, կսկսի վախենալ ամբողջ դասարանի առաջ գրատախտակի մոտ կանգնած դաս պատասխանել, անգամ կվախենա ծնողական ժողովներից: Ֆոբիայի այս տեսակը կոչվում է "դպրոցական ֆոբիա":
Եթե նկատել եք, որ երեխան հաճախ է բողոքում գլխի կամ էլ փորիկի ցավերից և հաճախ պատճառ է ման գալիս դպրոց չգնալու համար, ապա դուք պետք է մտածեք, թե ինչպես օգնեք նրան պայքարել այդ խնդրի դեմ: Բղավելու և բարկանալու կարիք չկա, փորձեք խաղաղ ճանապարհով երեխային սովերեցնել սիրել դպրոցը: Նա մեծանում է և արդեն ավագ դասարաններում կկողմնորոշվի իր հետաքրքրությունների և նախասիրություների մեջ: Իսկ այժմ պարզապես օգնեք նրան չվախենալ դպրոցից և դպրոց հաճախել հաճույքով:
Եթե կան կոնկրետ պատճառներ դպրոցը չսիրելու համար, ապա հարկ է մտածել դպրոցը փոխելու մասին, ուրիշ դպրոց, որտեղ նա իրեն ավելի հետաքրքիր և հարմարավետ կզգա: Կարող եք անգամ խորհրդակցել նրա հետ, թե ինչ թեքումով դպրոց կցանկանա հաճախել: | 
