Ժամանակակից հոգեբանությունը զանազանում է մարդկանց մեկը մյուսի վրա ներգործելու երեք ուղի`
1. Բացատրություն
2. Համոզում
3. Ներշնչում:
Իսկ ինֆորմացիայի տեսության մեջ տարբերում են խոսքային ինֆորմացիայի երեք տիպ`
1. Հաղորդում
2. Համոզում
3. Ներշնչում:
Երկու դեպքում էլ ներշնչումը դիտվում է որպես մարդկանց միջև փոխներգործության և փոխազդեցության միջոց:
Ըստ բուլղար գիտնական Գ. Լոզանովի շարադրած տվյալների, առ այսօր կա ներշնչում հասկացության քսանյոթ տարբեր սահմանումներ:
Լայն առումով ՙներշնչում՚ հասկացությունը սահմանվում է իբրև մի մարդու` մյուսի վրա ունեցած այն հոգեկան ներգործությունը, ազդեցությունը, որի ժամանակ ներշնչվողի մեջ առաջանում են որոշակի մտապատկերներ, արարքներ:
Վ. Մ. Բեխտերևը, որը մեծ ծառայություն ունի քննարկվող պրոբլեմին մշակման գործում, նշել է, թե մարդու ընկալումը կարող է լինել ակտիվ և պասիվ:
Ներշնչումն այս կամ այն վիճակի անմիջական պատվաստումն է որևէ մեկի մեջ` ներգործողի կողմից: Այլ կերպ ասած, ներշնչումը ոչ այլ ինչ է, եթե ոչ մարդու գիտակցության մեջ որևէ գաղափարի, հոգեվիճակի մուծումն առանց ներշչվող սուբյեկտի անմիջական մասնակցության, որի հետևանքով վերջինս շատ դեպքերում, անզոր է լինում հակակայելու այդ ներգործմանը:
Ինչպես և ռեֆլեքսը, ներշնչման գործունեությունը ներառում է երեք գործոն`
1. Արտաքին ներգործություն
2. Կենտրոնական օղակ
3. Պատասխան:
Առաջինը կարող է արտահայտվել ներշնչողի (տվյալ դեպքում ուսուցչի, դստիարակի և հոգեբանի) խոսքերով, գործունեություններով, կամ արվեստի և գրականության երկերով:
Երկրորդը` (ներշնչման ըմբռնումը) պատկերի առաջացմամբ, մտապատկերների ձևավորմամբ:
Երրորդը` (ընդունված ներշնչման կատարումը) ներշնչվողի ցուցումների անառարկելի կատարման միջոցով:
Վ. Ն. Կուլիկովը տարբերում է ներշնչման երկու տեսակ`
1. Ուղղակի կամ բաց
2. Անուղղակի կամ փակ:
Իսկ Ի. Ե. Շվարցը զանազանում է մանկավարժական ներշնչման հետևյալ տեսակները`
- Ուղղակի մանկավարժական ներշնչում
- Անուղղակի մանկավարժական ներշնչում
- Ինքնաներշնչում
- Հոգեկան
- Ռելաքսոպեդիա`1 բարոյական դաստիարակության և դիդակտիկական նպատակներով:
Անուղղակի մանկավարժական ներշնչումը նպատակ ունի անուղղակիորեն ներազդել դպրոցականի հոգեվիճակի կամ արարքի վրա տվյալ կոնկրետ իրադրությունում, պահանջվում է նուրբ մոտեցում, երբ բացառվում է վարքի նորմերի բացատրությունը կամ ուղղակի ներշնչումը:
Բարոյական դաստիարակության նպատակով կիրառվող ռելաքսոպեդիան նպատակ ունի բարձրացնել կամ իջեցնել դպրոցականի հավակնությունները, հաղթահարել նրա վարքագծում ամրակայված նեգատիվ դիրքորոշումները: Ներշնչման այս տեսակը կիրառվում է այն անչափահասի, դեռահասների ու պատանիների նկատմամբ, որոնց վարքագծում տեղ են գտել հակահասարակական արարքներ:
Ինչ վերաբերում է ինքնաներշնչմանը, ապա այն չի կարելի համարել ուրիշի խոսքի ազդեցությամբ առաջացած երևույթ, ուստի այն դիտարկվում է առանձին:
Ներշնչումը ներհատուկ է բոլոր մարդկանց: Սակայն տարբեր մարդիկ տարբեր կերպով են ենթարկվում ներշնչման, ոմանք` հեշտ ու արագ, մյուսները` դանդաղ և դժվարությամբ:
Հաստատված է, որ երեխաներին հատուկ է ավելի մեծ ներշնչելիություն, քան մեծահասակներին: Դա բացատրվում է երեխաների մտքի թույլ քննադատականությամբ, կամքի թուլությամբ, ընդօրինակելու հակումով և այլ պատճառներով:
Հարկավոր է ներշնչումից տարբերել ինքնաներշնչումը: Վերջինս ուղղված է ինքն իրեն: Այն հանդես է գալիս ինքնահրամանի, ինքնաոգևորման և այլ ձևերով:
Ինքնաներշնչման մեջ տարբերվում են հետևյալ տարատեսակները`
1. Նախամտադրված և ոչ նախամտադրված
2. Դրական և բացասական
3. Յուրահատուկ և ոչ յուրահատուկ
4. Անմիջական և ոչ անմիջական:
Դժվար չէ նկատել, որ ներշնչման տարատեսակների այսպիսի բաժանումն արվում է տարբեր հիմքերով և կրում է պայմանական բնույթ: Մի դեպքում հիմք է ընդունում ներշնչման նպատակի առկայությունը կամ ոչ կամային բնույթը, մյուս դեպքում` ներշնչման բովանդակությունը, երրորդ դեպքում` ժամանակային գործոնը և այլն:
Ինքնաներշնչումը, ինչպես և ներշնչումը կրում է ռեֆլեկտոր բնույթ: Բայց այստեղ գործում են գործողության վերջին երկու մասերը` այն պրոցեսները, որոնք կատարվում են գլխուղեղում մտածածի կամ զգացածի ազդեցությամբ և պատասխան ռեակցիան: Այստեղ չկա ուրիշ մարդկանց արտաքին ազդեցությունը, մարդն ինքն է ներգործում իր վրա:
Ներշնչումը կարելի է բաժանել երեք տեսակի`
1. Ներշնչում բնական քնի ժամանակ
2. Ներշնչում հիպնոսային քնի ժամանակ
3. Ներշնչում արթուն վիճակում:
Ներշնչման ազդեցությունն աշակերտների անձնավորության վրա զգալի չափով կախված է իրադարձությունից, որի պայմաններում արվում է ներշնչումը:
ՙՍովորողների ակտիվությունը փոխանցելու կարևոր միջոց է վստահություն ներշնչելը: Վստահությունը շոշափում է մարդու զգացմունքները, առաջացնում է այն արդարացնելու ձգտում, ներշնչող ակտիվությունը` ներշնչելու ցանկություն՚: Ա. Ս. Մակարենկո:
Ներշնչումը ճիշտ հասկանալու նպատակով դիտումներ են եղել ժամանակակից հոգեբանների կողմից, որոնք էլ ցույց են տվել, որ այսօրվա շատ ուսուցիչ դաստիարակներ, ներշնչման նպատակով, օգտագործում են խոսքը, հայացքը, միմիկան, պանթոմիմիկան1:
Դեռահասների ու պատանիների նկատմամբ (որոնք չափազանց զգայուն են իրենց վարքի գնահատման հանդեպ) ներշնման կիրառման ուսումնասիրությունները ցույց են տվել, որ լավ արդյունք է տալիս այսպես կոչված, անուղղակի, փակ ներշնչումը` զուգակցված բացատրության և համոզելու հետ:
Ներշնչման հնարը կիրառելիս անհրաժեշտ է հաշվի առնել ներշնչվողի (տվյալ դեպքում անչափահասի, դեռահասի և պատանու) հոգեվիճակը:
Գերմանացի հոգեբան Վ. Շտեռնը ձևակերպեց երեխայի հոգեկան զարգացման հայտնի` երկու գործոնների կոնվերգենցիայի տեսությունը: Այդ տեսության համաձայն երեխայի հոգեկան զարգացումը պայմանավորված է ժառանգականության և միջավայրի գործոններով, իսկ ուսուցումը սոսկ հարմարվում է հոգեկան զարգացմանը: Այլ կերպ ասած, ուսուցումը չի ազդում զարգացման վրա:
Երեխայի զարգացման մակարդակներն ըստ Լ. Ս. Վիգոտսկու հետևյալն են`
ա). Ակտուալ զարգացման գոտի
բ). Մերձավորագույն զարգացման գոտի:
Առաջինը երեխայի հոգեկան ֆունկցիաների զարգացման այն մակարդակն է, որն արդեն գոյացել է, այսինքն առկա է: Սակայն զարգացման այդ մակարդակը չի կարելի դարձնել ուսուցման նշանակետ, քանի որ այն չի ապահովում երեխայի հետագա զարգացման պրոցեսը:
ՙԱյն պրոցեսը,- գրում է Լ. Ս. Վիգոտսկին,-որը կողմնորոշվում է դեպի զարգացման արդեն ավարտված շարքերը, անգործուն է երեխայի ընդհանուր զարգացման առումով. այդպիսի ուսուցումն իր ետևից չի տանում զարգացման պրոցեսը, այլ ինքը քարշ է գալիս զարգացման պոչից՚:
Երկրորդն իր մեջ ներառում է`
ա). Դպրոցականի ակտուալ կամ իրական զարգացման մակարդակը
բ). Նրա զարգացման պոտենցիալ հնարավորությունները զարգացման պրոցեսում:
Ուսուցումը կզարգացնի այն դեպքում, եթե առաջ անցնի երեխայի զարգացման առկա մակարդակից, նպատակակետ ունենալով նրա զարգացման պոտենցիալ հնարավորությունները, այն, ինչը դեռ լրիվ չի դրսևորվել, բայց գտնվում է լինելիության պրոցեսի մեջ:
ՙԱյսպիսով,-գրում է Վիգոտսկին,-այս գոտին կօգնի որոշել երեխայի վաղվա օրը, նրա զարգացման դինամիկ վիճակը՚:
Հատուկ հետազոտությունները ցույց են տվել, որ յուրաքանչյուր դասարանում սովորաբար կարելի է առանձնացնել սովորողների հետևյալ երեք խմբերը.
ա). Աշակերտներ` բարձր պոտենցիալ հնարավորություններով, որոնք գերազանցում են նրա փաստացի նվաճումները: Ուսուցման պրոցեսում նրանք պահանջում են համեմատաբար քիչ օգնություն: Նրանք արագորեն յուրացնում են հասկացությունները: Ստուգողական աշխատանքում չեն կատարում սխալներ: Այդ խմբին պատկանում են նաև այսպես կոչված ՙընդունակ՚, սակայն ՙծույլ՚ դպրոցականները, որոնցից կան ամեն դասարանում:
բ). Աշակերտներ` առավել ցածր պոտենցիալ հնարավորություններով: Նրանք կատարում են շատ սխալներ, պահանջում են մեծ օգնություն: Նրանք հասկացությունը չեն յուրացնում մինչև վերջ, լրիվ: Այդպիսի աշակերտները սովորաբար կողմնորոշվում են դեպի որևէ մեկ հատկանիշ, այն դեպքում, երբ առաջին խմբի աշակերտներն ուշադրություն են դարձնում բոլոր էական հատկանիշների վրա: Ստուգողական աշխատանքում կատարում են սխալներ:
գ). Աշակերտներ` ցածր պոտենցիալ հնարավորություններով: Նրանց պետք է ցույց տրվի լուրջ օգնություն, որպեսզի նրանք հասկանան իրենց սխալները: էական հատկանիշների յուրացումը տեղի է ունենում մեծ դժվարությամբ և դանդաղ: Ավելի դժվար իրավիճակներում հասկացություններ սահմանելիս նույնպես կողմնորոշվում են դեպի ոչ էական հատկանիշները:
Ն. Ա. Մենչինսկայան տարբերեց զարգացման երկու` ՙմակրո՚ և ՙմիկրո՚ պլան: Առաջին դեպքում նկատի է առնվում զարգացումը` ուսուցման մեջ տարիքային մի փուլից մյուս փուլին անցնելու ընթացքում: Երկրորդ դեպքում խոսքը վերաբերում է այն փոփոխություններին, որոնք տեղի են ունենում գիտելիքներին տիրապետելու ընթացքում միևնույն տարիքային փուլում: Զարգացման այդ երկու պլանները, ունենալով ընդհանուր կողմեր, ամբողջությանբ վերցրած չեն համընկնում:
Նա բացահայտեց քննարկվող պրոբլեմի մի այլ առում ևս. ՙՄտավոր զարգացումը,-գրում է Ն. Ա. Մենչինսկայան,-դետերմինավորվում1 է ոչ միայն արտաքին, այլև ներքին պայմաններով, այսինքն այն կախված է զարգացման արդեն նվաճված մակարդակից, երեխայի տարիքային և անհատական-հոգեբանական առանձնահատկությունից՚:
Իսկ Մ. Ա. Դանիլովը ձևակերպեց և հիմնավորեց զարգացնող ուսուցման մի շարք ընդհանուր դրույթները:
1 Ռելաքսոպեդիա-ֆիզիկական թուլացում
1 Դետերմինիզմ-երևույթբերի պատճառահետևանքային կապը
|